Ar do ġaḃáil trí Ċorca Ḋuiḃne ḋuit…

Sóisialta

I dtaobh tithe tábhairne de, sa dúthaigh seo tá daichead ’s deich. Gheobhfá ceol breá Gaelach i Neligan’s sa Daingean, ’s bíonn rince seit ann gach Luan ar a leathuair tar éis a hocht. Is minic go mbíonn ceol traidisiúnta in John Benny’s nó Hannie Agnie’s leis. Ach más piúnt ar do shuaimhneas atá uait, ní raighfeá amú thiar ar an mBuailtín i do rogha tábhairne. Gheobhfá rogha beorach deas, go ndeintear ar an Riasc, i dTigh Bhric.

Teanga

B’fhiú go mór dul siar timpeall Chinn Sléibhe go Tigh Khruger tráthnóna ’s deoch a chur díot chun cluas a chur le muintir na háite is iad i mbun comhrá. Ba dheacair teacht ar Ghaelainn ní ba bhreátha ná mar a bhfaighfeá ansan.

Tá foinse láidir eile ar an mbaile céanna, Dún Chaoin, in Ionad an Bhlascaoid. Tá idir thaifead ’s leabhair ar amhráin, ar dhaoine, ar sheanchas agus ar dhúlra na háite le feiscint ann.

Cé gur mórán atá ar fáil sa Ghaeltacht so, i dtaobh teangan de, ba mhór an trua teacht is gan rian do choise a fhágaint ar an mBlascaod Mór.

Suite ar Ché Dhún Chaoin, d’fhéadfá caife agus donnóg dheas a dh’fháilt i gCupán Sé ’s tú ag fanacht ar an mbád amach go dtín oileán.

Tá foinse mhaith leabhar Gaelainne ar fáil ins an gCaifé Liteartha sa Daingean.

Is tú ag taisteal, is mó úsáid a bhainfeá as an bhfoclóir seo a leanas, b’fhéidir chun go ligfeá ort gur de shliocht na háite tú.

• Conas tánn tú?/Conas tá ’gat?

• Táim go diail, ambaiste!

• Aon scéal? Diabhal faic!

• A’ gcualaís fé _____?

• A’ bhfeadairís cáil ____? N’fheadar!

• Caid = peil

Tabhair fé deara go gcuirtear an bhéim ar an tarna leath d’fhocail nuair is féidir, agus go gcuirtear an briathar agus an forainm pearasanta le chéile i gcónaí nach mór m.sh. chuaigh + mé = chuas, d’imir muid = d’imríomar. Is mó eolas eile a gheobhfá i leabhar Dhiarmuid Uí Shé, An Teanga Bheo, Corca Dhuibhne.

Tráiġeanna

• An Béal Bán (siúlóid ’s radharcanna breátha)

• Ceann Trá (uisce is teo anso de réir dealraimh)

• Tráigh Bhaile ’n Chaladh (radharc deas ar luí na gréine)

• Clochar (radharc aoibhinn ar an Marbhán (Inis Tuaisceart), is minic go mbeadh tonnta fiachmhara anso – ní mholtar dul ag snámh)

• Poll Mhac an tSaoi (oiriúnach do shnámh ag barra taoide nuair athánn sé ciúin, in aice le hIonad an Bhlascaoid)

Siúlóidí

• Siúlóid Naomh Gobnait (ó Ionad an Bhlascaoid) – 30n

• Cuas na Nae (ó Chlochar) – 45n

• Cruach Mhárthain (ón gCeathrúin) – 1u 45n

Láiṫreacha Stairiúla

B’fhiú, dar liom, cuairt a thabhairt orthu so a leanas chun tuiscint níos fearr a dh’fháilt ar stair Chorca Dhuibhne, go háirithe má thánn tú cóngarach dóibh is fonn siúil ort.

• Sáipéilín Ghallarais (turas tionlactha ar fáil)

• Dún an Óir

• Cill Mhaoilchéadair

• Cathair Deargáin

• An Dún Mór